BC: BC Hydro ਨੇ ਤੂਫ਼ਾਨ ਤੋਂ ਪ੍ਰਭਾਵਿਤ 272,000 ਵਿੱਚੋਂ 175,000 ਤੋਂ ਵੱਧ ਗ੍ਰਾਹਕਾਂ ਦੀ ਬਿਜਲੀ ਮੁੜ ਸਥਾਪਤ ਕਰ ਦਿੱਤੀ ਹੈ। ਇਸ ਦੇ ਬਾਵਜੂਦ ਸਵੇਰੇ 6:30 ਵਜੇ ਤੱਕ 95,000 ਗ੍ਰਾਹਕ ਅਜੇ ਵੀ ਬਿਜਲੀ ਬਿਨਾ ਹਨ, ਜਿਹਨਾਂ ਵਿੱਚ ਜ਼ਿਆਦਾਤਰ Vancouver Island ਅਤੇ Gulf Islands ਪ੍ਰਭਾਵਿਤ ਹੋਏ ਹਨ। ਸਭ ਤੋਂ ਪ੍ਰਭਾਵਿਤ ਇਲਾਕਿਆਂ ਵਿੱਚ Nanaimo, Victoria, Duncan ਅਤੇ Ladysmith ਸ਼ਾਮਲ ਹਨ। ਕਰਮਚਾਰੀ ਨੁਕਸਾਨੇ ਹੋਏ ਸਾਜ਼ੋ-ਸਮਾਨ ਦੀ ਮੁਰੰਮਤ ਕਰਨ ਵਿਚ ਲਗੇ ਹਨ, ਪਰ ਮਲਬੇ ਅਤੇ ਤੀਬਰ ਹਵਾਵਾਂ ਨਾਲ ਚੁਣੌਤੀਆਂ ਦਾ ਸਾਹਮਣਾ ਕਰ ਰਹੇ ਹਨ। BC Hydro ਨੇ ਲੋਕਾਂ ਨੂੰ ਡਿੱਗੀਆਂ ਤਾਰਾਂ ਨੂੰ 911 ‘ਤੇ ਰਿਪੋਰਟ ਕਰਨ ਅਤੇ 10 ਮੀਟਰ ਦੀ ਦੂਰੀ ਬਣਾਈ ਰੱਖਣ ਦੀ ਸਲਾਹ ਦਿੱਤੀ ਹੈ।
B.C. ਦੇ South Coast ਵਿੱਚ ਆਈਆਂ ਤੀਬਰ ਹਵਾਵਾਂ ਦੇ ਕਾਰਨ BC Ferries ਨੇ ਅੱਜ ਸਵੇਰੇ ਕਈ ਸੇਵਾਵਾਂ ਰੱਦ ਕਰ ਦਿੱਤੀਆਂ। Tsawwassen, Duke Point, Swartz Bay, ਅਤੇ Horseshoe Bay-Departure Bay ਦੀਆਂ 9 ਵਜੇ ਤੱਕ ਦੀਆਂ ਸੇਵਾਵਾਂ ਰੱਦ ਰਹੀਆਂ। ਇਹ ਸੇਵਾਵਾਂ ਸੁਰੱਖਿਆ ਦੇ ਮੱਦੇਨਜ਼ਰ ਰੱਦ ਕੀਤੀਆਂ ਗਈਆਂ ਹਨ। BC Ferries ਨੇ ਕਿਹਾ ਹੈ ਕਿ ਪ੍ਰਭਾਵਿਤ ਗ੍ਰਾਹਕਾਂ ਨੂੰ ਸੰਪਰਕ ਕੀਤਾ ਜਾਵੇਗਾ।