ਵੈਨਕੂਵਰ: ਵੈਨਕੂਵਰ ਸਕੂਲ ਡਿਸਟ੍ਰਿਕਟ ਦੀ ਇੱਕ ਰਿਪੋਰਟ ਦੱਸਦੀ ਹੈ ਕਿ ਵੈਨਕੂਵਰ ਦੇ ਦੋ ਤਿਹਾਈ ਹਾਈ ਸਕੂਲ ਭੂਚਾਲ ਦੌਰਾਨ ਗੰਭੀਰ ਨੁਕਸਾਨ ਜਾਂ ਢਹਿ ਜਾਣ ਦੇ ਉੱਚ ਜੋਖਮ ਵਿੱਚ ਹਨ। ਜਿਸਦਾ ਅਰਥ ਹੈ 21,000 ਤੋਂ ਵੱਧ ਵਿਦਿਆਰਥੀ ਅਜਿਹੇ ਸਕੂਲਾਂ ਵਿੱਚ ਦਾਖਲ ਹਨ, ਜੋ ਇੰਜਨੀਅਰਾਂ ਦਾ ਮੰਨਣਾ ਹੈ ਕਿ ਭੁਚਾਲ ਜਿਹੀ ਕੁਦਰਤੀ ਆਫ਼ਤ ਦੌਰਾਨ ਡਿੱਗ ਸਕਦੇ ਹਨ। ਇਹਨਾਂ ਵਿੱਚੋਂ ਬਹੁਤੇ ਜੋਖਮ ਭਰੇ ਸਕੂਲ ਸਾਊਥ ਈਸਟ ਵੈਨਕੂਵਰ ਵਿੱਚ ਹਨ, ਜਿੱਥੇ ਕੋਈ ਵੀ ਹਾਈ ਸਕੂਲ ਭੂਚਾਲ ਤੋਂ ਸੁਰੱਖਿਅਤ ਨਹੀਂ ਮੰਨਿਆ ਜਾਂਦਾ ਹੈ।
ਇਸ ਦੇ ਉਲਟ, ਵੈਨਕੂਵਰ ਦੇ ਬਹੁਤ ਸਾਰੇ ਐਲੀਮੈਂਟਰੀ ਸਕੂਲਾਂ ਨੂੰ ਸੁਰੱਖਿਆ ਨੂੰ ਬਿਹਤਰ ਬਣਾਉਣ ਲਈ ਪਹਿਲਾਂ ਹੀ ਅੱਪਗਰੇਡ ਕਰ ਦਿੱਤਾ ਗਿਆ ਹੈ। ਰਿਪੋਰਟ ਦੱਸਦੀ ਹੈ ਕਿ ਸੁਰੱਖਿਅਤ ਸਕੂਲਾਂ ਲਈ ਫੰਡਾਂ ਦੀ ਵੰਡ ਵੀ ਨਹੀਂ ਹੈ। ਪੱਛਮੀ ਹਿੱਸੇ ਦੇ ਮੁਕਾਬਲੇ ਪੂਰਬੀ ਹਿੱਸੇ ‘ਚ ਭੁਚਾਲ ਤੋਂ ਸੁਰੱਖਿਅਤ ਘੱਟ ਹਾਈ ਸਕੂਲ ਹਨ।
ਵੈਨਕੂਵਰ ਸਕੂਲ ਬੋਰਡ ਨੇ ਆਪਣੀ ਪੰਜ-ਸਾਲਾ ਯੋਜਨਾ ਵਿੱਚ ਅੱਪਗ੍ਰੇਡ ਕਰਨ ਲਈ ਕਈ ਸਕੂਲਾਂ ਨੂੰ ਤਰਜੀਹ ਦਿੱਤੀ ਹੈ, ਜਿਸ ਵਿੱਚ ਕਿਲਾਰਨੀ ਅਤੇ ਥੌਮਸਨ ਹਾਈ ਸਕੂਲਾਂ ਦੇ ਨਾਲ-ਨਾਲ ਕਿੰਗ ਜੌਰਜ ਸੈਕੰਡਰੀ ਅਤੇ ਦੋ ਐਲੀਮੈਂਟਰੀ ਸਕੂਲ ਸ਼ਾਮਲ ਹਨ। ਇਹ ਯੋਜਨਾਵਾਂ , ਐਜੁਕੇਸ਼ਨ ਮਹਿਕਮੇ ਤੋਂ ਮਨਜ਼ੂਰੀ ਲਈ ਲੰਬਿਤ ਹਨ, ਜਿਨ੍ਹਾਂ ਨੂੰ ਜਵਾਬ ਦੇਣ ਲਈ ਅਗਲੇ ਸਾਲ ਦੇ ਮਾਰਚ ਤੱਕ ਦਾ ਸਮਾਂ ਲੱਗ ਸਕਦਾ ਹੈ। ਇੱਕ ਵਾਰ ਮਨਜ਼ੂਰੀ ਮਿਲਣ ਤੋਂ ਬਾਅਦ, ਅੱਪਗ੍ਰੇਡ ਪੂਰਾ ਹੋਣ ਵਿੱਚ ਸੱਤ ਤੋਂ ਨੌਂ ਸਾਲ ਲੱਗ ਸਕਦੇ ਹਨ।
ਸੂਬੇ ਨੇ 2005 ਤੋਂ ਲੈਕੇ ਹੁਣ ਤੱਕ ਭੁਚਾਲ ਸੁਰੱਖਿਅਤ ਸਕੂਲ ਬਣਾਉਣ ਲਈ $2.9 ਬਿਲੀਅਨ ਖਰਚ ਕੀਤੇ ਹਨ ਅਤੇ ਆਪਣੀ ਤਾਜ਼ਾ ਯੋਜਨਾ ‘ਚ ਵਾਧੂ $1.1 ਬਿਲੀਅਨ ਅਲਾਟ ਕੀਤੇ ਹਨ। ਜ਼ਿਕਰਯੋਗ ਹੈ ਕਿ ਬੀ.ਸੀ. ਸੂਬੇ ‘ਚ 498 ਸਕੂਲਾਂ ਵਿੱਚੋਂ 222 ਸਕੂਲ ਭੁਚਾਲ ਸੁਰੱਖਿਅਤ ਬਣਾ ਦਿੱਤੇ ਗਏ ਹਨ ਅਤੇ 16 ਹੋਰ ਪ੍ਰਗਤੀ ਅਧੀਨ ਹਨ।